20. Dezember ... De Jummikrepp...

Mucher Senioren-Adventskalender

Von Bruno Rödder,
eingereicht von K. Weidenfeld

Ich weiß et hück nit mih jenau,
wor et Ohm Hein ov wor `t sing Frau.
Die zwei, die han mir hingerloße
en Kressdaachskrepp för opzeblose.

Aan Technik jov et do nit vill:
De Krepp hatt hingen e Ventill.
Do kunnte Kleine un och Jroße
met der Muul de Luff renblose.

Wor dat jedon, dann sohch mer sillich
et Jesuskind met der Famillich.
Och Esel, Schof un och noch zwei Ohße
woodten dobei opjeblose.

Nohdem ich all dat hatt jemaht,
han ich mich ovends hinjelaht.
Am nöchste Morje, dutverschreck,
feel op de Krepp der eeschte Bleck.

Sujet jedaach hätt ich jo nie:
Der Jupp hing schlapp üvver `m Marie.
E janz klei Loch en singer Plaat
hatt der Jupp su schlapp jemaht.

Ich han ne Käues meer jekäut
un en der Kopp erenjedäut.
Dann koot jeblose – et maht flupp!
Do stundt hä widder, unsre Jupp.

Der Esel maht e lang jeseech,
wor met der Zick och nit mih deech.
Et Kresskind – ich woodt janz nervös –
wor op eimol och porös.

Jefleck han ich un vill jeklääv,
domet se Kressdach noch erlääv.
Doch plötzlich maht et janz laut peng!
Do wor et met der Krepp am Eng.

Wat do jeschenk häs kräje,
brengk nit nor Freud un Säje.
Schingk dat Jeschenk och jot jeflääch,
pröv eesch, ov alles richtich deech!
 

Die Gummikrippe

Von Bruno Rödder,
eingereicht von K. Weidenfeld

Ich weiß es heute nicht mehr genau,
war es Onkel Heinrich oder war es seine Frau
.
Die zwei, die haben mir hinterlassen
eine Weihnachtskrippe zum Aufblasen.

An Technik gab es da nicht viel:
Die Krippe hatte hinten ein Ventil.
Da konnten Kleine und auch Große
mit dem Mund die Luft reinblasen.

War das getan, dann sah man seelig
das Jesuskind mit seiner Familie.
Auch Esel, Schaf und auch noch zwei Ochsen
wurden dabei aufgeblasen.

Nachdem ich all das gemacht habe,
habe ich mich abends hingelegt.
Am nächsten Morgen, totverschreckt,
fiel auf die Krippe der erste Blick.

So etwas habe ich ja nie gedacht:
Der Josef hing schlaff über der Maria.
Ein ganz kleines Loch in seiner Glatze
hat der Josef so schlapp gemacht.

Ich habe einen Kaugummi gekaut
und  in den Kopf geklebt.
Dann kurz geblasen - es macht flupp!
Da stand er wieder, unser Josef.

Der Esel macht ein langes Gesicht,
er war mit der Ziege auch nicht mehr dicht.
Das Christkind – ich wurde ganz nervös –
war auf einmal auch porös.

Geflickt habe ich und viel geklebt,
damit sie Christtag noch erlebt.
Doch plötzlich macht es ganz laut peng!
Da war es mit der Krippe am Ende.

Was Du geschenkt bekommst,
bringt nicht nur Freude und Segen.
Scheint das Geschenk auch noch gepflegt,
prüf erst,  ob alles richtig ist dicht!

Zurück